आरंभ मराठी / धाराशिव
उपमुख्यमंत्री आणि शिवसेनेचे मुख्य नेते एकनाथ शिंदे यांच्या आजच्या धाराशिव दौऱ्यापूर्वीच शिवसेनेतील दोन पदाधिकाऱ्यांना पोलिसांनी ताब्यात घेत नजरकैदेत ठेवले आहे. युवा सेनेचे राष्ट्रीय कार्यकारिणी सदस्य अविनाश खापे आणि शिवसेनेचे पदाधिकारी नितीन पाटील यांना शिराढोण पोलिसांनी आज सकाळी अचानक ताब्यात घेतले.
मिळालेल्या माहितीनुसार, सकाळीच पोलिसांनी दोघांना त्यांच्या ठिकाणाहून उचलून शिराढोण पोलीस स्टेशनमध्ये आणले. या कारवाईमागे उपमुख्यमंत्री शिंदे यांच्या दौऱ्यात कोणताही गोंधळ किंवा कायदा-सुव्यवस्थेचा प्रश्न निर्माण होऊ नये, हा उद्देश असल्याचे पोलिसांनी स्पष्ट केले आहे. दोघांचे मोबाईल फोनही पोलिसांनी जप्त केले असून शिंदे यांचा दौरा पूर्ण होईपर्यंत त्यांना सोडण्यात येणार नसल्याची माहिती देण्यात आली आहे.
दरम्यान, अविनाश खापे हे शिवसेनेतील आक्रमक नेते म्हणून ओळखले जातात. जिल्हा परिषद निवडणुकीपूर्वी त्यांनी भाजपाकडून शिवसेनेवर होत असलेल्या अन्यायाविरोधात आवाज उठवून पक्षातील अंतर्गत नाराजी उघडपणे मांडली होती. त्यावेळी पालकमंत्री प्रताप सरनाईक यांच्या उपस्थितीत, शिवसेनेचे जिल्हा संघटक सुधीर पाटील यांच्या निवासस्थानी मोठा गोंधळही झाला होता.
या घटनेनंतर शिवसेनेतील अंतर्गत वाद चव्हाट्यावर आले होते. तसेच, अविनाश खापे हे आमदार व माजी मंत्री डॉ. तानाजीराव सावंत यांचे समर्थक मानले जातात. त्यामुळे या कारवाईकडे राजकीय दृष्टिकोनातूनही पाहिले जात आहे.
आज एकनाथ शिंदे हे धाराशिव शहरात शिवसेनेच्या कार्यकर्त्यांचा मेळावा घेणार आहेत.
याआधीच काही पदाधिकाऱ्यांनी समाज माध्यमांवर कार्यक्रमाबाबत काही वक्तव्ये केल्याची माहिती समोर आली होती. त्याच पार्श्वभूमीवर संभाव्य गोंधळ टाळण्यासाठी पोलिसांनी खबरदारीचा उपाय म्हणून ही कारवाई केल्याचे सांगितले जात आहे. एकूणच, शिंदे यांच्या दौऱ्यापूर्वी झालेल्या या कारवाईमुळे धाराशिवच्या राजकीय वर्तुळात चर्चांना उधाण आले आहे.
