आरंभ मराठी / कळंब
केज तालुक्याचे तहसीलदार राकेश गिड्डे यांचा आज (दि.९) सकाळी लातूर–अंबाजोगाई महामार्गावर रेणापूर फाट्याजवळ झालेल्या भीषण कार अपघातात दुर्दैवी मृत्यू झाला. या घटनेमुळे संपूर्ण केज तालुक्यासह महसूल विभागात शोककळा पसरली असून सर्वत्र हळहळ व्यक्त केली जात आहे.
प्राथमिक माहितीनुसार, तहसीलदार गिड्डे हे स्वतः कार चालवत प्रवास करत होते. दरम्यान, अचानक वाहनावरील नियंत्रण सुटल्याने कार पलटी होऊन गंभीर अपघात झाला. अपघाताची तीव्रता इतकी भीषण होती की त्यांचा जागीच मृत्यू झाल्याचे समोर आले आहे. अपघाताच्या वेळी ते कारमध्ये एकटेच असल्याची माहिती मिळाली आहे. घटनेची माहिती मिळताच रेणापूर पोलीस तात्काळ घटनास्थळी दाखल झाले.
त्यांनी पंचनामा करून मृतदेह ताब्यात घेतला असून उत्तरीय तपासणीसाठी रेणापूर येथील ग्रामीण रुग्णालयात पाठविण्यात आला आहे. या प्रकरणी पुढील तपास पोलीस करत आहेत. राकेश गिड्डे हे कर्तव्यदक्ष, कार्यक्षम आणि तरुण अधिकारी म्हणून ओळखले जात होते.
त्यांच्या अकाली निधनामुळे केज तालुक्याच्या प्रशासनात मोठी पोकळी निर्माण झाली आहे. त्यांच्या कार्यपद्धतीमुळे नागरिकांमध्येही त्यांच्याबद्दल विशेष आदर होता. त्यांच्या निधनाने सर्व स्तरांतून शोक व्यक्त करण्यात येत असून अनेकांनी श्रद्धांजली अर्पण केली आहे.
