आरंभ मराठी / धाराशिव
रस्त्याचे काम न करता सात लाखांचा शासकीय निधीचा अपहार केल्याप्रकरणी जिल्हा परिषदेच्या बांधकाम विभागातील दोन अभियंत्यासह तीन व्यक्तींवर गुन्हा दाखल करण्यात आला आहे. ग्रामपंचायत कसबे तडवळे (ता. धाराशिव) येथे 14 व्या वित्त आयोगाच्या निधीतून मंजूर करण्यात आलेल्या सिमेंट रस्ता व नाली बांधकामाच्या कामात मोठ्या प्रमाणात गैरव्यवहार झाल्याचा प्रकार उघडकीस आला आहे.
मंजूर निधी काढून प्रत्यक्षात कोणतेही काम न करता शासनाची तब्बल 6 लाख 95 हजार 365 रुपयांची फसवणूक केल्याप्रकरणी ढोकी पोलीस ठाण्यात तिघांविरुद्ध गुन्हा दाखल करण्यात आला आहे. या प्रकरणातील आरोपींमध्ये मन्मथ सुभाष आवटे (रा. कसबे तडवळे, ता. जि. धाराशिव), डी. के. पाटील (कनिष्ठ अभियंता, जिल्हा परिषद बांधकाम विभाग, धाराशिव, रा. काकडे प्लॉट, धाराशिव) आणि के. एन. साठे (उप अभियंता, जिल्हा परिषद बांधकाम विभाग, धाराशिव – मयत) यांचा समावेश आहे.
याबाबत पंचायत समिती धाराशिव येथील विस्तार अधिकारी संजय संतराम ढाकणे (वय 55 वर्षे) यांनी 18 फेब्रुवारी 2026 रोजी ढोकी पोलीस ठाण्यात फिर्याद दिली. फिर्यादीनुसार, आरोपींनी दिनांक 14 जानेवारी 2020 ते 5 ऑक्टोबर 2020 या कालावधीत ग्रामपंचायत कसबे तडवळे हद्दीतील मधुकर प्लॉटिंग परिसरात रेल्वे स्टेशनकडे जाणाऱ्या रस्त्याचे तसेच हावळे प्लॉटिंग परिसरातील सिमेंट रस्ता व नाली बांधकामाचे काम करण्यासाठी 14 व्या वित्त आयोगाच्या निधीतून एकूण 6,95,365 रुपये मंजूर करून घेतले.
मात्र, संबंधित कामे प्रत्यक्षात न करता खोटे कागदपत्र तयार करून निधीचा अपहार करण्यात आला. शासनाच्या निधीचा अपव्यय करून फसवणूक केल्याचा आरोप या तिघांवर ठेवण्यात आला आहे.
या प्रकरणी ढोकी पोलीस ठाण्यात भारतीय दंड संहितेच्या कलम 409 (विश्वस्ताने अपहार), 420 (फसवणूक), 467, 468 (बनावट कागदपत्र तयार करणे), 471 (बनावट कागदपत्राचा वापर) आणि 34 (सामूहिक हेतू) अन्वये गुन्हा नोंदवण्यात आला आहे. या प्रकरणाचा पुढील तपास ढोकी पोलीस करत आहेत.
