आरंभ मराठी / धाराशिव
वाशी तालुक्यातील मांडवा येथील एका व्यक्तीकडून तीन लाख रुपये किंमतीचा तब्बल 14 किलो गांजा जप्त करण्यात आला आहे. एकाच व्यक्तीकडे इतक्या मोठ्या प्रमाणात गांजा सापडल्यामुळे परिसरात खळबळ उडाली आहे.
दोन दोन किलोच्या सात पॅकेटमध्ये हा गांजा आढळून आला असून, आरोपीला पोलिसांनी सापळा रचून अटक केली आहे. यासंबंधी सविस्तर वृत्त असे की, पोलीस अधीक्षक श्रीमती रितू खोकर यांनी स्थानिक गुन्हे शाखेला जिल्ह्यामध्ये अंमली पदार्थ विक्री करणाऱ्या व्यक्तींचा शोध घेऊन त्यांच्यावर कडक कारवाई करण्याचे आदेश दिले आहेत.
त्यानुसार शनिवारी (दि.4) स्थानिक गुन्हे शाखेचे सपोनि कासार व त्यांचे पथक पेट्रोलिंग करत होते. त्यावेळी त्यांना गोपनीय बातमीदारामार्फत खबर मिळाली की, एक व्यक्ती वाशी तालुक्यातील मांडवा येथे गांजा विक्री करता येणार आहे.
स्थानिक गुन्हे शाखेच्या पथकाने तात्काळ वाशी पोलिसांच्या मदतीने त्या ठिकाणी सापळा रचून छापा टाकला. त्यावेळी एक व्यक्ती 7 पॉकेट मध्ये गांजा घेऊन आलेला त्यांना दिसला. त्याला तात्काळ ताब्यात घेऊन घटनास्थळावरून 14.236 किलो हिरव्या रंगाचा उग्र वास येत असलेला गांजा जप्त केला.
जप्त केलेल्या गांजाची एकूण किंमत 2 लाख 84 हजार इतकी आहे. पंचनामा करून हा सर्व माल जप्त करण्यात आला. ताब्यात घेण्यात आलेल्या आरोपीचे नाव संजय अर्जुन शिंदे (वय 35 वर्षे रा. मांडवा ता. वाशी, जि. धाराशिव) असे आहे. त्याच्या विरुद्ध वाशी पोलीस ठाण्यामध्ये गुरन ३२३/२५ कलम 8 क सह 20, (2), ब, एन डी पी एस कायद्यान्वये गुन्हा दाखल करण्यात आला आहे.
आरोपीने हा गांजा कुठून आणला तसेच तो कोणाला विक्री करत होता याबाबत पोलीस अधिक तपास करीत आहेत. ही कामगिरी पोलीस अधिक्षक रितु खोखर व अपर पोलीस अधिक्षक शफकत आमना यांचे मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सपोनि सुदर्शन कासार,पोह शौकत पठाण, प्रकाश औताडे, जावेद काझी, दत्तात्रय राठोड, फरहान पठाण, दयानंद गादेकर, पोलीस अंमलदार योगेश कोळी, चालक पोह सुभाष चौरे, चालक पोलीस अंमलदार रत्नदीप डोंगरे, पोह बाबा जाधवर पोस्टे वाशी, पोलीस अंमलदार विठ्ठल मलंगनेर पोस्टे वाशी, नागनाथ गुरव यांच्या पथकाने केली.
