आरंभ मराठी / धाराशिव
महाराष्ट्राचे उपमुख्यमंत्री व राष्ट्रवादी काँग्रेसचे अध्यक्ष अजित पवार यांच्या अपघाती निधनाने राज्यावर शोककळा पसरली आहे. या कठीण परिस्थितीत पवार कुटुंबासह पक्षावर आलेली जबाबदारी स्वीकारत अजित पवारांच्या पत्नी व धाराशिवच्या कन्या सुनेत्राताई पवार यांनी राजकीय धुरा हाती घेतली असून त्या आज उपमुख्यमंत्रीपदाची शपथ घेणार आहेत. यामुळे महाराष्ट्राच्या पहिल्या महिला उपमुख्यमंत्री म्हणून त्यांची इतिहासात नोंद होणार आहे.
बुधवारी झालेल्या विमान अपघातात अजित पवार यांचे निधन झाल्यानंतर राष्ट्रवादी काँग्रेसचे नेतृत्व कोण करणार, याबाबत राजकीय वर्तुळात चर्चा सुरू होत्या. दोन दिवसांच्या चर्चेनंतर अजित पवारांच्या पश्चात सुनेत्राताई पवार यांच्याकडे नेतृत्व सोपवण्याचा निर्णय झाला. त्यानुसार आज दुपारी त्यांचा शपथविधी होणार आहे. अजित पवारांकडे असलेली महत्त्वाची खाती सुनेत्राताई पवार यांच्याकडे येण्याची शक्यता आहे.
सुनेत्राताई पवार यांचे माहेर धाराशिव असून त्यांनी पुणे येथे उच्च शिक्षण घेतले आहे. त्या सध्या राज्यसभा सदस्य आहेत. बारामतीच्या विद्या प्रतिष्ठान या नामांकित शिक्षण संस्थेची जबाबदारीही त्या सांभाळत आहेत. पक्ष एकसंघ ठेवणे, दोन्ही राष्ट्रवादींना एकत्र आणणे आणि पक्षाची ध्येयधोरणे तळागाळापर्यंत पोहोचवणे, अशी आव्हाने आता त्यांच्यासमोर आहेत. धाराशिवची कन्या राज्याच्या उपमुख्यमंत्रीपदी विराजमान होत असल्याने जिल्ह्यात समाधान आहे.
