पोलिसांनी कॉल ट्रेस, सिसिटीव्ही फुटेजवरून ७ दिवसात लावला छडा
८ वर्षांपूर्वीच्या बातमीचा राग मनात धरून हल्ल्याचा प्रयत्न
आरंभ मराठी / धाराशिव
पत्रकार रवींद्र केसकर यांचे अपहरण करून जीवे मारण्याचा प्रयत्न करणाऱ्या आरोपीचा पोलिसांनी अवघ्या ७ दिवसात छडा लावला असून, पाचपैकी दोन जणांना अटक करण्यात आली आहे.यातील मुख्य आरोपी हा बडतर्फ पोलीस उपनिरीक्षक प्रेमकुमार बनसोडे हा असून, त्याने मित्राच्या मदतीने हल्ल्याचा प्रयत्न केला. त्याने धाराशिव शहरातील शाहू नगर भागातील एका अल्पवयीन मुलीवर बलात्कार केला होता. त्याच्यावर पोस्कोसह गंभीर गुन्हे दाखल झाले होते. त्यानंतर त्याला १० वर्षाची शिक्षा लागली होती. जामीनवर बाहेर आल्यानंतर त्याने हा प्रकार केल्याचे समोर आले आहे.
१ एप्रिल रोजी रात्री पत्रकार केसकर घरी जाताना त्यांची गाडी अडवून त्यांचे अपहरण करण्याचा प्रयत्न करण्यात आला तसेच प्रतिकार केल्यानंतर मारहाण करून दुचाकी चोरून नेली. याप्रकरणी शहर पोलिसात गुन्हा दाखल करण्यात आला होता. याबाबत पत्रकार संघाच्या वतीने पोलीस प्रशासनासह मुख्यमंत्री, गृहमंत्र्यांना निवेदन देऊन आरोपीना तातडीने अटक करण्याची मागणी करण्यात आली होती. पोलीस अधीक्षक अतुल कुलकर्णी यांच्या धडाकेबाज मोहिमेनंतर पोलिसांनी अवघ्या सात दिवसात आरोपीचा शोध लावला असून, यातील प्रमुख आरोपी हा शहरातील शाहू नगर येथील प्रेम बनसोडे असून, त्याने चार मित्रांच्या मदतीने हा प्रकार केला.
काय आहे प्रकरण.?
प्रेमकुमार बनसोडे हा पोलीस उपनिरीक्षक असताना म्हणजे ८ वर्षापूर्वी त्याने
रिव्हॉल्वरचा धाक दाखवून ११ वीमध्ये शिकणाऱ्या एका अल्पवयीन मुलीवर बलात्कार केला होता. याप्रकरणी शहर पोलीस ठाण्यात पोस्कोसह गंभीर गुन्हे दाखल झाले होते. या प्रकरणाने संपूर्ण राज्यात खळबळ उडाली होती.प्रकारणाचे गांभीर्य लक्षात घेऊन राष्ट्रवादी काँग्रेसचे नेते शरद पवार यांनी धाराशिव येथे येऊन पोलीस प्रमुखांना तातडीने तपास करण्याच्या सूचना केल्या होत्या. याप्रकरणी जलदगती न्यायालयाने बनसोडे याला १० वर्षाची शिक्षा सुनावली होती.शिक्षा भोगत असताना काही दिवसांपूर्वी त्याला जामीन मिळाला होता. याप्रकरणात केसकर यांनी बातम्या केल्या होत्या. त्याचा राग बनसोडे याच्या मनात होता. त्यामुळे त्याने केसकर यांच्यावर पाळत ठेवली आणि त्यांना अडवून मारहाण केली तसेच अपहरण करण्याचा प्रयत्न केला. पोलिसांनी याप्रकरणी सखोल चौकशी केली. स्थानिक गुन्हे शाखेच्या पथकाने सिसिटीव्ही फुटेज, कॉल ट्रेस करून दोन आरोपीचा शोध घेतला. दत्तात्रय भरत नरसिंगे (रा. तांदुळजा, ता.लातूर ) याला अटक करण्यात आली. त्याच्याकडून गुन्ह्यात वापरलेली मोटारसायकल जप्त करण्यात आली. त्याच्याकडे सखोल चौकशी केल्यानंतर त्याने बडतर्फ प्रेमकुमार बनसोडे याच्या नियोजनानुसार केल्याचे सांगितले. त्यानंतर शिराढोण पोलिसाच्या मदतीने प्रेम बनसोडे याला कळंब तालुक्यातील जायफळ येथून अटक करण्यात आली आहे. यातील अन्य तीन आरोपीना लवकरच अटक करण्यात येईल असे पोलीस अधीक्षक अतुल कुलकर्णी यांनी सांगितले. पोलिसांनी तातडीने शोध घेऊन आरोपीना अटक केल्याबद्दल धाराशिव जिल्हा पत्रकार संघाच्या वतीने पोलीस प्रशासनाचे आभार मानण्यात आले.
काय होता उद्देश..?
पत्रकार केसकर यांचे अपहरण करून त्यांच्याकडून बलात्कार प्रकरणातील मुलीची माहिती घेण्याचा उद्देश होता, असे आरोपीनी पोलिसांना सांगितले. त्यानंतर संबंधित मुलीपर्यंत पोहोचण्याचा आरोपीचा उद्देश होता.
