प्रतिनिधी / तुळजापूर
शहरातील डाॅ. बाबासाहेब आंबेडकर चौकात भवानी रोडवर खुलेआम अवैध प्रवाशी वाहतूक सुरू असून, रस्त्यावर लावण्यात आलेल्या या वाहनामुळे भवानी रोडवर वाहतूक कोंडी होत आहे. मात्र भाविकांच्या वाहनांना ऑनलाईन दंड ठोठावणारे पोलीस अवैध वाहतूक करणाऱ्या या वाहनांकडे ‘अर्थपूर्ण’ दुर्लक्ष करत असल्याने आश्चर्य व्यक्त करण्यात येत आहे.
डॉ.बाबासाहेब आंबेडकर चौकात हाॅटेल कैलाससमोर अवैध प्रवाशी वाहतूक बिनबोभाट सुरू आहे. या ठिकाणी सोलापूर तसेच येरमाळासाठी अवैध प्रवाशी वाहतूक करण्यात येत असते. मात्र रोडवरच वाहने उभी करण्यात येत असल्याने डॉ. आंबेडकर चौकात वाहतूक कोंडी होत असून वाहनांच्या रांगा लागत असतात. सातत्याने होत असलेल्या वाहतूक कोंडीमुळे नागरिकांसह भाविकांना त्रास सहन करावा लागत आहे. मात्र भाविकांच्या वाहनांना ऑनलाईन दंड फाडणारे पोलीस अवैध वाहतूक करणाऱ्या या वाहनाकडे सोयीस्कर डोळेझाक करत असल्याने अवैध प्रवाशी वाहतूक करणाऱ्या वाहनांची संख्या दिवसेंदिवस वाढत आहे. विशेष म्हणजे जिल्हाधिकारी, पोलीस अधीक्षक नेहमी या मार्गाने ये-जा करीत असतानाही खुलेआम सुरू असणाऱ्या अवैध वाहतूकीकडे दुर्लक्ष होत असल्याने आश्चर्य व्यक्त करण्यात येत आहे.
वाहतूकीचे नियम केवळ नागरिक आणि भाविकांसाठीच
तीर्थक्षेत्र तुळजापूरातील वाहतुकीला शिस्त लावण्याच्या नावाखाली शहरातील प्रमुख रस्त्यावर लोखंडी गेट लावण्यात येऊन नागरिक, भाविकांची वाहने रोखण्यात येत आहेत. मात्र नागरिक, भाविकांच्या वाहनांवर निर्बंध घालण्यात येत असताना अवैध वाहतूक वाल्यावर मेहेरबानी का,असा सवाल विचारण्यात येत आहे.
