दोन दिवस भरगच्च कार्यक्रम
अमोलसिंह चंदेल / शिराढोण
सोमवार, २२ जानेवारी रोजी पावन भूमी अयोध्या नगरीमध्ये प्रभु श्री रामलल्लांची भव्य दिव्य मंदिरात प्राणप्रतिष्ठापणा होणार आहे. याचे औचित्य साधून शिराढोण येथील राम नगर (माकोडे वस्ती) येथील राम मंदिरातही श्रीराम मूर्तीची प्राणप्रतिष्ठा होणार असून,
यनिमित्त रविवारी ग्रामदिंडी तसेच रात्री ह. भ. प. दत्तात्रय महाराज पांचाळ यांचे कीर्तनाचे आयोजन करण्यात आले होते.
यामध्ये श्री रामभक्तांनी सहभागी होऊन मनोभावे पूजन केले. गावातील प्रत्येक घरासमोर व संपूर्ण बाजारपेठेत रांगोळी काढण्यात आली होती. अतिशय मंगलमय वातावरणात जय श्रीराम या नामघोषात ही ग्रामदिंडी काढण्यात आली. गावातील श्री विठ्ठल रुक्मिणी मंदिरापासून ते रामनगर शिराढोण अशी ही ग्रामदिंडी काढण्यात आली होती.
रामभक्तांचा मोठा सहभाग
गावातून ग्रामदिंडी निघणार असल्याने गावातील महिला, युवक, नागरिक मोठ्या संख्येने सहभागी झाले होते. गावात रस्त्याच्या दोन्ही बाजूनी रांगोळी काढून, श्रीरामाच्या मूर्तीवर पुष्पवृष्टी करण्यात आली.
