आरंभ मराठी । धाराशिव
अल्पावधीत सर्वाधिक लोकप्रिय झालेल्या दैनिक आरंभ मराठीच्या द्वितीय वर्धापन दिनाचा आरंभ स्नेह मेळावा शहरातील श्रीपतराव भोसले हायस्कूल येथे आयोजित करण्यात आला आहे. रविवार, २२ मार्च रोजी सायंकाळी सहा ते नऊ वाजेपर्यंत हा मेळावा होणार असून, या मेळाव्याला उपस्थित राहण्याचे आवाहन करण्यात आले आहे. २६ जानेवारी
२०२४ रोजी दैनिक आरंभ मराठी या वृत्तपत्राची धाराशिवमध्ये सुरुवात झाली. विश्वासार्ह बातम्या, निःपक्ष आणि निर्भीड भूमिका मांडत आरंभ मराठीने केवळ जिल्ह्यातच नव्हे तर सोलापूर, कोल्हापूर, सांगली, पुणे, लातूर जिल्ह्यात देखील आपला वाचकवर्ग निर्माण केला. आरंभ मराठीने सातत्याने सामाजिक प्रश्नांवर भूमिका घेतली. त्यामुळे सरकारी पातळीवर रखडलेल्या काही योजना मार्गी लागल्या आणि थेट नागरिकांशी संबंधित
रस्ते, पाणी, सुरक्षा आदी प्रश्नांना उत्तर मिळाले. महिलांच्या संदर्भातील अडचणी आरंभ मराठीने सातत्याने मांडल्या. धाराशिव शहरातील सार्वजनिक स्वच्छतागृह, टवाळखोराकडून होणारी छेडछाड, कौटुंबिक हिंसाचार अशा अनेक समस्या मांडताना त्याचा सातत्याने पाठपुरावा केला. शेतकरी हा जगाचा पोशिंदा असला तरी इथली व्यवस्था ही त्याच्याकडे कायम दुर्लक्ष करत आहे. या व्यवस्थेला भानावर आणण्यासाठी शेतमालाचे भाव,
शेतकऱ्यांची होणारी गळचेपी, पीकविमा, अनुदान या नेहमीच्या समस्यांसह अतिवृष्टीने होत असलेले नुकसान आणि न मिळणारी भरपाई यासाठी आरंभ मराठीने अनेकवेळा वृत्तमालिका चालवली, तज्ञ मान्यवरांच्या मुलाखती घेतल्या. दरम्यान, शासनातील भ्रष्ट अधिकाऱ्यांना देखील जरब बसावी, प्रशासकीय कार्यालयामध्ये होणारी अडवणूक थांबावी यासाठी देखील आरंभ मराठी कायम सतर्क असते. शहरी भागात नागरिकांच्या
समस्या जाणून घेण्यासाठी आरंभ मराठीने अभियान राबवले. त्यातून नागरिकांच्या समस्या समोर आल्या आणि त्याचे निराकरणही झाले. आरंभ मराठीचा दोन वर्षांचा हा प्रवास तसा मोठा पल्ला नाही. पण इतक्या कमी कालावधीत दैनिकाने लक्षावधी वाचकांची पसंती मिळवली हे उल्लेखनीय आहे. अवघ्या एकाच वर्षात आरंभने जिल्ह्याबाहेर पदार्पण केले. आरंभमराठीच्या या दैदिप्यमान वाटचालीमध्ये अर्थातच असंख्य वाचक, जाहिरातदार आणि
लाखो हितचिंतकांच्या सदिच्छा, शुभेच्छा सोबत आहेत. त्याशिवाय हा प्रवास सोपा नाही. म्हणूनच आरंभ मराठी परिवारावर प्रेम करणाऱ्या तमाम
वाचक, जाहिरातदारांचे ऋण व्यक्त करण्यासाठी आरंभ स्नेह मेळावा आयोजित करण्यात आला असून, श्रीपतराव भोसले हायस्कूल (जुनी इमारत) येथे रविवारी सायंकाळी साडेसहा वाजता होणाऱ्या या सोहळ्यास मोठ्या संख्येने उपस्थित राहून आरंभ परिवाराचा भाग बनावे, असे आवाहन करण्यात आले आहे.
