आरंभ मराठी / तुळजापूर
तुळजापूर शहरातील ड्रग्स रॅकेट प्रकरणी पोलिसांनी कारवाई करत आणखी दोन आरोपींना ताब्यात घेतले. सुलतान शेख याला पुण्यातून आणि जीवन साळुंखे याला सोलापूरहून पोलिसांनी अटक केली आहे.
दरम्यान आता ह्या प्रकरणातील संशयित आरोपींची संख्या १८ वर पोहोचली असून, यामधील १२ जणांना अटक करण्यात आली आहे. तर दोन जण फरार असून चार जणांची नावे अद्यापही गोपनीय ठेवण्यात आली आहेत. तुळजापूर येथे विक्रीसाठी येणारे ड्रग्स तामलवाडी येथे पकडल्यानंतर पहिल्यांदा हा धक्कादायक प्रकार उघडकीस आला होता. तुळजापूर शहरात हा धंदा गेली अनेक वर्ष सुरु असल्याचे बोलले जात आहे.
दरम्यान या प्रकरणी पालकमंत्री प्रताप सरनाईक यांनी आक्रमक भूमिका घेत कोणाचीही गय करु नका असे आदेश पोलिसांना दिले होते. त्यानंतर पोलिसांनी याप्रकरणी गतिमान तपास सुरू केला आहे. दरम्यान या प्रकरणात यापूर्वी मुंबई कनेक्शन समोर आले होते. आता या दोन आरोपींच्या अटकेने सोलापूर व पुणे कनेक्शन देखील समोर आले आहे. दरम्यान अजून काहीजण सहभागी असण्याची शक्यता व्यक्त केली जात आहे.
पोलिसांनी सुलतान शेख याला रविवारी ताब्यात घेतले असून, जीवन साळुंखे याला सोमवारी पहाटे पोलिसांनी ताब्यात घेतले आहे. त्यांना सोमवारी न्यायालयासमोर हजर केले जाण्याची शक्यता आहे. दरम्यान या प्रकरणातील यापूर्वीच्या दहा आरोपींना न्यायालयीन कोठडी मिळालेली आहे.
तसेच मुंबईतील संशयित महिला आरोपी संगीता गोळे हिची मालमत्ता पोलिसांनी जप्त केली आहे. या प्रकरणाचा तपास पोलीस अधीक्षक संजय जाधव, उपविभागीय पोलीस अधिकारी डॉ. निलेश देशमुख यांच्या मार्गदर्शनाखाली तामलवाडी पोलीस स्टेशनचे पोलीस निरीक्षक गोकुळ ठाकूर हे करत आहेत.
चार गोपनीय कोण ?
या प्रकरणात पोलसांनी चार जणांची नावे गोपनीय ठेवली आहेत. त्यामुळे ते चार जण कोण आहेत याबाबत शहरात उलटसुलट चर्चा सुरु असून, शहरातील अनेकजण नॉट रिचबल असल्याचे बोलले जात आहे.
