पोलिस कर्मचाऱ्याकडूनच घेतली होती 95 हजारांची लाच
आरंभ मराठी / धाराशिव
मुलाला गुन्ह्यातून वाचवण्यासाठी एका पोलिस कॉन्स्टेबलकडून सुमारे 95 हजारांची लाच घेणाऱ्या धाराशिव ग्रामीण पोलीस ठाण्याचा पोलिस निरीक्षक मारुती शेळके याना अटक करण्यात आली असून, त्याना एक दिवसाची पोलिस कोठडी सुनावण्यात आली आहे.
या कारवाईनंतर जिल्हा पोलिस अधीक्षक कार्यालयाकडून शेळके याच्या निलंबनाचा प्रस्ताव पोलिस महानिरीक्षक (आयजी) कार्यालयाकडे पाठवण्यात आला होता. या प्रस्तावानुसार शेळके यांच्यावर निलंबनाच्या कारवाईची टांगती तलवार असून, आजच यासंदर्भातील कारवाईचे आदेश निघणार असल्याचे सांगण्यात येत आहे.
वादग्रस्त पोलिस निरीक्षक मारुती शेळके कळंब येथे कार्यरत असताना अनेक वादग्रस्त प्रकरणे समोर आली होती. सर्वसामान्यांवर दादागिरी करून सिंघम म्हणून ओळख निर्माण करण्याचा त्यांचा उद्देश स्वतःच्या फायद्यासाठी होता. धाराशिव ग्रामीण पोलीस ठाण्याचा कारभार हातात आल्यानंतर त्यांनी तोच कित्ता कायम ठेवला.
अखेर आपल्याच खात्यातील महिला कॉन्स्टेबलकडून एका प्रकरणात 95 हजारांची लाच घेताना त्यांना बुधवारी अटक करण्यात आली. या अटकेदरम्यान शेळके पोलिसांच्या ताब्यातून सुटून पळून गेले होते. मात्र,पोलिसांनी पाठलाग करून त्यांना बेड्या ठोकल्या. गुरुवारी न्यायालयाने त्यांना एक दिवसांची पोलिस कोठडी सुनावली.
त्यानंतर जिल्हा पोलिस अधीक्षक कार्यालयाकडून शेळके यांच्या निलंबनाचा प्रस्ताव पोलिस महानिरीक्षक कार्यालयाला पाठवण्यात आला होता.
या प्रस्तावावर कार्यवाही झाली असल्याचे सांगण्यात येत आहे. शेळके यांच्यावर निलंबनाच्या कारवाईची टांगती तलवार आहे.आजच त्यांच्यावरील कारवाईचे आदेश निघण्याची शक्यता आहे.
काय आहे प्रकरण ?
मुलाला गुन्ह्यातून वाचवण्यासाठी एका पोलिस कॉन्स्टेबल महिलेकडून 95 हजार रुपये स्वीकारताना धाराशिव ग्रामीण पोलीस ठाण्याचे पोलीस निरीक्षक मारुती शेळके आणि त्याच पोलीस स्टेशनची अंमलदार मुक्ता लोखंडे या दोघांना लाचलुचपत प्रतिबंधक विभागाने बुधवारी दुपारी शहरातील शासकीय विश्रामगृहासमोर रंगेहात पकडले.
एकाच प्रकरणात पोलीस स्टेशनच्या दोन कर्मचाऱ्यांवर ट्रॅप झाल्यामुळे पोलीस प्रशासनात खळबळ उडाली होती. एकीकडे जिल्ह्यात चोऱ्या, दरोडे, गुन्हेगारी वाढली असताना पोलीस मात्र लाचखोरीत अडकत आहेत. त्यामुळे चिंता व्यक्त केली जात आहे.
