लाडक्या भावांचा वनवास ; चार महिन्यांपासून वेतन नाही

युवा प्रशिक्षणार्थ्यांकडे शासनाचे दुर्लक्ष ; शासकीय आस्थापनांची असहकार्याची भूमिका

आधार व्हेरिफिकेशन आणि प्रेझेंटी रिपोर्टमुळे मानधन मिळण्यास उशीर

आरंभ मराठी / धाराशिव

अत्यंत गाजावाजा करून सुरू करण्यात आलेली ‘लाडका भाऊ’ योजना अर्थात मुख्यमंत्री युवा कार्यप्रशिक्षण योजनेतील युवकांवर उपासमारीची वेळ आली आहे. मागील चार महिन्यांपासून लाडक्या भावांना शासनाने वेतनच दिले नसल्यामुळे लाडक्या भावांचा वनवास सुरू असल्याचे चित्र आहे.

फेब्रुवारी महिन्यात सहा महिन्यांची मुदत संपलेल्या युवकांना शासनाने पाच महिने मुदतवाढ देऊन योजनेचा कालावधी अकरा महिन्यांचा करण्याचा मोठा निर्णय घेतला. त्याप्रमाणे फेब्रुवारी महिन्यात पुन्हा हे प्रशिक्षणार्थी युवक कामावर रुजू झाले. परंतु, बदललेली वेबसाईट, शासकीय आस्थापनांनी हजेरी पत्रक वेळेत न देणे तसेच आधार व्हेरिफिकेशनची टाकलेली अट यांमुळे फेब्रुवारी ते मे या चार महिन्यांच्या कालावधीतील वेतन थकीत राहिले आहे. सत्ताधाऱ्यांसह विरोधी पक्षातील लोकप्रतिनिधी देखील या प्रश्नाकडे लक्ष देत नसल्यामुळे लाडक्या भावांवर सध्या उपासमारीची वेळ आली आहे

विधानसभा निवडणुकीच्या अगोदर महायुती सरकारने युवकांची मते आपल्याकडे खेचण्यासाठी मुख्यमंत्री युवा कार्यप्रशिक्षण योजना सुरू केली. शासकीय कार्यालयात सहा महिने कामाचा अनुभव मिळेल म्हणून तरुण-तरुणींनी या योजनेला उत्स्फूर्त प्रतिसाद दिला. धाराशिव जिल्ह्यातील तब्बल पाच हजार युवक या योजनेतून कामाला लागले. तुटपुंजा पगार असला तरी बेरोजगार युवकांना हाताला काम मिळाल्यामुळे त्यांचा आत्मविश्वास दुणावला होता.

परंतु, विधानसभा निवडणूक पार पडताच शासनाने शासकीय कार्यालयातील प्रशिक्षण बंद करण्याचा निर्णय घेतला. प्रशिक्षणार्थ्यांची फक्त खासगी संस्थांमध्ये यापुढे नियुक्ती केली जाणार आहे. त्यातच गेल्या चार महिन्यांपासून हे लाडके भाऊ वेतनापासून वंचित आहेत. यापुढे काम करावे की थांबावे, अशा संभ्रमावस्थेत प्रशिक्षणार्थी युवक आहेत.

फेब्रुवारीमध्ये पुन्हा वाढीव पाच महिन्यांसाठी जे उमेदवार रुजू झाले त्यांचे हजेरी पत्रक संबंधित कार्यालयाकडून कौशल्य विकास विभागास दिले जात नाही अशी तक्रार प्रशिक्षणार्थी करत आहेत. तसेच प्रशिक्षणार्थी उमेदवारांची वेबसाईटवर अगोदरच नोंदणी आणि डॉक्युमेंट अपलोड केलेले असतानाही पुन्हा एकदा आधार व्हेरिफिकेशन आणि डॉक्युमेंट अपलोड करायला सांगितले जात आहे.

या सर्व तांत्रिक अडचणीमुळे मागील चार महिन्यांपासून प्रशिक्षणार्थी उमेदवार पगारापासून वंचित आहेत. धाराशिव जिल्ह्यात या योजनेतून ४९८२ तरुण-तरुणी काम करत आहेत. यातील मोजक्या उमेदवारांना पगार मिळाला असला तरी बहुतांश उमेदवार चार महिन्यांपासून पगारापासून वंचित आहेत.

धाराशिव जिल्ह्यातील प्रशिक्षणार्थी संख्या –

जिल्ह्यातील एकूण प्रशिक्षणार्थी -४९८२

खाजगी आस्थापना -१५७

खाजगी आस्थापनेत काम करणारे प्रशिक्षणार्थी -१२२१

सरकारी आस्थापना -२०८

सरकारी आस्थापनेत काम करणारे प्रशिक्षणार्थी -३७६१

. मुदत वाढवली : पाच महिने

पदवीधरासाठी मानधन : दहा हजार रुपये

बारावी उत्तीर्ण युवकांना : सहा हजार रुपये

आयटीआय, पदविका : आठ हजार रुपये

जिल्ह्याला महिन्याला लागतात ५ कोटी रुपये

मुख्यमंत्री युवा कार्यप्रशिक्षण योजनेत धाराशिव जिल्ह्यातील ४९८२ तरुण तरुणी प्रशिक्षण घेतात. यांना मानधन म्हणून महिन्याला साधारण पाच कोटी रुपये द्यावे लागतात. ही योजना आता अकरा महिन्यांची झाल्यामुळे वर्षाला ५० कोटींपेक्षा अधिकचा निधी फक्त धाराशिव जिल्ह्यासाठी लागणार आहे.

पेमेंटसाठी आधार व्हेरिफिकेशन आवश्यक

मुख्यमंत्री युवा कार्यप्रशिक्षण योजनेची वेबसाईट बदलली आहे. त्यामुळे पुन्हा कामावर रुजू झालेल्या सर्व प्रशिक्षणार्थी उमेदवारांना आधार व्हेरिफिकेशन करून पुन्हा डॉक्युमेंट अपलोड करावे लागणार आहेत. ज्यांनी प्रोसेस पूर्ण केली आहे त्यांचे वेतन जमा झाले आहे. ज्या उमेदवारांकडून दिलेल्या सूचनांचे पालन झाले नाही त्यांचे वेतन जमा झालेले नाही. सर्व युवा प्रशिक्षणार्थ्यांनी आधार व्हेरिफिकेशन करून पुन्हा डॉक्युमेंट अपलोड करावेत.

संजय गुरव
सहायक आयुक्त
कौशल्य विकास व रोजगार व उद्योजकता, धाराशिव.

शासकीय आस्थापना सहकार्य करत नाहीत

शासकीय आस्थापना प्रशिक्षणार्थी तरुणांना सहकार्य करत नाहीत. हजेरी पत्रक मुद्दाम कौशल्य विभागास पाठवले जात3ल नाही. त्यामुळे पगारास दिरंगाई होते. योजना चांगली असताना शासकीय कर्मचाऱ्यांकडूनच प्रशिक्षणार्थी युवकांची पिळवणूक होत आहे.

धनाजी हुकमते
अध्यक्ष, मुख्यमंत्री युवा कार्यप्रशिक्षण संघटना.

पुन्हा पुन्हा तेच डॉक्युमेंट मागितले जातात

युवा प्रशिक्षणार्थी म्हणून आम्ही सुरुवातीला जे जे डॉक्युमेंट मागितले होते ते सर्व त्यावेळी दिले होते. आधार व्हेरिफिकेश देखील केले होते. परंतु, आता पुन्हा तेच डॉक्युमेंट मागितले जात आहेत. त्यामुळे खूप जणांचे पगार होऊ शकले नाहीत.

ज्योती कागदे
युवा प्रशिक्षणार्थी, वाशी.