आरंभ मराठी / धाराशिव
तलावात बुडून एका शाळकरी मुलाचा मृत्यू झाल्याची घटना सोमवारी सकाळी उघडकीस आली आहे. हा प्रकार शहरातील धाराशिव लेणी परिसरात घडला असून, त्यामुळे सर्वत्र हळहळ व्यक्त होत आहे. हा मुलगा श्रीपतराव भोसले हायस्कूल शाळेत शिक्षण घेत होता.
आर्यन अनंत बीडकर (१४), असे तलावात बुडलेल्या मुलाचे नाव असून, तो शहरातील काकडे प्लॉट, नारायण कॉलनी भागात वास्तव्यास होता. रविवारी दुपारी घरातून खेळण्यासाठी बाहेर पडला होता. रात्री उशिरापर्यंत तो घरी न आल्याने नातेवाईकांनी सर्वत्र शोध घेण्याचा प्रयत्न केला. मात्र त्याचा पत्ता लागला नव्हता.सोमवारी सकाळी लेणी परिसरात असलेल्या एका साठवण तलावाच्या भरावावर आर्यन याचे कपडे आढळून आले. त्यानंतर पालिकेच्या तसेच अग्निशमन दलाच्या जवानांनी तलावात शोधकार्य सुरू केले. बऱ्याच प्रयत्नानंतर पाण्याच्या तळाशी आर्यन याचा मृतदेह आढळला. त्यानंतर जिल्हा रुग्णालयात शवविच्छेदन करण्यात आले.
या घटनेने हळहळ व्यक्त होत असून, आर्यन नेमका पाण्यात कसा बुडाला,तो कोणासोबत पोहण्यासाठी गेला होता, त्याच्यासोबत कोण कोण होते,याबद्दलचा तपशील समजू शकला नाही.
आर्यन हा शहरातील भोसले हायस्कूल येथे शिकत होता. रविवारी शाळेला सुट्टी असल्याने दुपारी तो खेळण्यासाठी बाहेर पडला होता,असे नातेवाईकांनी सांगितले.
