कळंब न्यायालयाचा निकाल
आरंभ मराठी / धाराशिव
6 आणि 13 वर्षांच्या सख्ख्या बहिणींवर लैंगिक अत्याचार केल्याप्रकरणी 79 वर्षांच्या आरोपीला पॉक्सो कायद्यांतर्गत कळंब न्यायालयाने पाच वर्ष सक्तमजुरी आणि दंडाची शिक्षा सुनावली आहे. कळंब तालुक्यात घडलेल्या या घटनेनंतर जिल्ह्यात संतापाची लाट उसळली होती.
आरोपी साहेबराव बोबडे (वय 79) यास पाच वर्षे सक्त मजुरी व 3 हजार रूपये दंड तसेच दुसऱ्या कलमांतर्गत 1 वर्ष सक्त मजुरी व 1 हजार रूपये दंड अशी शिक्षा कळंब जिल्हा व सत्र न्यायाधीश आर. के. राजेभोसले यांनी सुनावली.
खटल्याची माहिती अशी की, 26 नोव्हेंबर 2020 ते 29 नोव्हेंबर 2020 या दरम्यान आरोपी साहेबराव नारायण बोबडे (वय 79, रा. कोथळा, ता. कळंब) याने घरामध्ये बोलावून अल्पवयीन बहिणींवर अत्याचार केला. तसेच पीडितांच्या घरामध्ये कोणी नसताना त्याचा गैरफायदा घेवून त्यांच्या घरामध्ये शिरून दोन्ही अल्पवयीन मुलींवर लैंगिक अत्याचार केला.
याप्रकरणी पिडितेच्या आईच्या तक्रारीवरून शिराढोण पोलिस ठाण्यात आरोपी साहेबराव बोबडेविरूध्द गुन्हा दाखल करण्यात आला होता. कलम 376 तसेच बाल लैंगिक अपराधापासून संरक्षण 2012 अंतर्गत कलम 4, 8, 10, 12 व कलम 452 भादंवि याप्रमाणे गुन्हा नोंद करण्यात आला होता. याचा तपास शिराढोण पोलीस ठाण्याचे पोलीस उपनिरीक्षक जी. व्ही. गोडसे यांनी पूर्ण करून दोषारोपपत्र कळंब येथील जिल्हा व सत्र न्यायालयात दाखल केले होते.
त्यानुसार न्यायालयामध्ये सरकारी पक्षातर्फे एकूण 13 साक्षीदार तपासण्यात आले. यामध्ये 13 वर्षीय पीडित मुलगी आणि 6 वर्षीय पीडित अल्पवयीन मुलींची साक्ष महत्वपूर्ण ठरली. तसेच अतिरिक्त सरकारी वकील ॲड. अशिष कुलकर्णी यांचा युक्तीवाद ग्राह्य धरून आरोपीस पाच वर्षे सक्त मजुरी व 3 हजार रूपये दंड व दुसऱ्या कलमांतर्गत 1 वर्षे सक्त मजुरी व 1 हजार रूपये दंड अशी शिक्षा कळंब जिल्हा व सत्र न्यायाधीश आर. के. राजेभोसले यांनी सुनावली.
