आरंभ मराठी / धाराशिव
उपमुख्यमंत्री अजितदादा पवार यांच्या दोन दिवसांपूर्वी झालेल्या दुर्दैवी विमान दुर्घटनेमुळे संपूर्ण महाराष्ट्र शोकसागरात बुडाला आहे. विकासाचा ध्यास घेतलेला, निर्णयक्षम आणि कणखर नेतृत्व हरपल्याची भावना राज्यभर व्यक्त केली जात आहे. सर्वसामान्य नागरिकांपासून राजकीय नेत्यांपर्यंत प्रत्येकजण अजितदादांच्या कार्याची उजळणी करत भावूक होत आहे.
मात्र, या पार्श्वभूमीवर एक राजकीय विरोधाभास चर्चेचा विषय ठरत आहे. नुकत्याच पार पडलेल्या पिंपरी-चिंचवड महानगरपालिका निवडणुकांच्या काळात अजितदादा पवार यांच्यावर अत्यंत एकेरी, खालच्या पातळीवर जाऊन टीका करणारे भाजप आमदार महेश लांडगे हेच आता अजितदादांच्या स्मृती जतन करण्यासाठी पुढे सरसावल्याचे चित्र समोर आले आहे.
पिंपरी-चिंचवड महानगरपालिका निवडणुकीदरम्यान आमदार महेश लांडगे यांनी अजितदादांचा एकेरी उल्लेख करत जाहीर सभांमधून जहरी टीका केली होती. या निवडणुकीत राष्ट्रवादी काँग्रेस पक्षाचा पराभव झाला आणि भाजपाला सत्ता मिळाली. निवडणुकीनंतरही अजितदादांवर टीकेची धार कमी झाली नव्हती. मात्र, महापालिका निकालानंतर अवघ्या बारा दिवसांतच अजितदादांचे दुर्घटनेत निधन झाल्याने संपूर्ण राजकीय वातावरण हादरून गेले.
या घटनेनंतर आता राजकीय सूर बदलताना दिसत आहे. दिवंगत अजितदादा पवार यांच्या स्मरणार्थ पिंपरी-चिंचवड शहरात भव्य ‘अजित सृष्टी’ उभारण्याचा महत्त्वपूर्ण निर्णय आमदार महेश लांडगे यांनी घेतला आहे. यासंदर्भात पिंपरी-चिंचवड महानगरपालिका प्रशासनाला तात्काळ कार्यवाहीचे आदेश देण्यात आले असून, नवनिर्वाचित नगरसेवकांच्या पहिल्याच सर्वसाधारण सभेत या प्रस्तावाला मंजुरी देण्यात येणार असल्याची माहिती देण्यात आली आहे.
“पिंपरी-चिंचवड शहर देशातील क्रमांक एकचे शहर बनवण्याचे दिवंगत अजितदादांचे स्वप्न पूर्ण करणे, हीच त्यांना खरी श्रद्धांजली ठरेल,” असे मत यावेळी व्यक्त करण्यात आले.
‘अजित सृष्टी’च्या माध्यमातून अजितदादांची विकासदृष्टी, लोककल्याणाची तळमळ आणि शहराच्या प्रगतीसाठी त्यांनी दिलेले योगदान पुढील पिढ्यांसाठी प्रेरणादायी ठरेल, असा दावा करण्यात येत आहे.
एकीकडे निवडणूक काळातील कडवट राजकारण, तर दुसरीकडे निधनानंतर उमटलेली श्रद्धांजली—या सगळ्या घडामोडींमुळे राजकारणातील दुटप्पीपणावर पुन्हा एकदा प्रश्नचिन्ह उपस्थित झाले असून, ‘टीकेपासून स्मारकापर्यंतचा प्रवास’ हा विषय सध्या राजकीय वर्तुळात चर्चेचा केंद्रबिंदू ठरत आहे.
