आरंभ मराठी / धाराशिव
महाराष्ट्र राज्य मार्ग परिवहन महामंडळाच्या (एसटी) सवलतीच्या प्रवासासाठी नॅशनल कॉमन मोबिलिटी कार्ड (NCMC) स्मार्ट कार्ड काढणे बंधनकारक केल्यानंतर धाराशिव बसस्थानकात गेल्या काही दिवसांपासून मोठी गर्दी होत होती. महिला, ७५ वर्षांवरील ज्येष्ठ नागरिक तसेच विद्यार्थी या सवलतधारक प्रवाशांना कार्ड काढणे आवश्यक असल्याने बसस्थानक परिसरात लांबच लांब रांगा लागल्या होत्या.
या वाढत्या गर्दीचा गैरफायदा घेत काही एजंटांकडून प्रवाशांची लूट होत असल्याचे प्रकार समोर आले होते. अधिकृतरित्या १९९ रुपयांत मिळणारे NCMC कार्ड २५० ते ३०० रुपयांपर्यंत विकले जात असल्याच्या तक्रारी प्रवाशांकडून करण्यात आल्या. धाराशिव जिल्ह्यातील NCMC कार्ड वितरणाचे टेंडर बार्शी येथील एका व्यक्तीला देण्यात आले असून, प्रत्येक तालुक्यात एजंटमार्फत ही सेवा सुरू करण्यात आली होती. मात्र, केवळ पंधरा दिवसांतच दरांमध्ये मोठी तफावत निर्माण झाली.
धाराशिव बसस्थानकात २५० रुपये, तुळजापूर येथे २५० रुपये, तर कळंब येथे २३० रुपये असे दर आकारले जात होते. काही ठिकाणी खासगी जागेतून कार्ड देताना ३०० रुपयांपर्यंत रक्कम उकळल्याच्या घटना देखील घडल्या. या प्रकाराविरोधात ‘आरंभ मराठी’ने आवाज उठवला होता. दरम्यान, या गैरप्रकारांनंतर मागील चार दिवसांपासून NCMC कार्ड काढण्याची सेवा पूर्णपणे बंद ठेवण्यात आली होती.
त्यामुळे कार्ड काढण्यासाठी येणाऱ्या प्रवाशांना मोठ्या अडचणींचा सामना करावा लागत होता. विशेषतः महिला व ज्येष्ठ नागरिकांना याचा मोठा त्रास सहन करावा लागला. यासंदर्भात ‘आरंभ मराठी’ने सोमवारी (दि.६) सविस्तर बातमी प्रसिद्ध करताच प्रशासनाकडून तत्काळ दखल घेत आजपासून (दि.७) पुन्हा NCMC कार्ड सेवा सुरू करण्यात आली आहे.
विशेष म्हणजे, सेवा पुन्हा सुरू झाल्यानंतर कार्डसाठी केवळ २०० रुपयेच शुल्क आकारले जात असल्याचे दिसून आले. सध्या बसस्थानकातील काउंटरबाहेर महिला व ज्येष्ठ नागरिकांची पुन्हा मोठी गर्दी झाली असली तरी, सेवा पूर्ववत झाल्यामुळे प्रवाशांना मोठा दिलासा मिळाला आहे. ‘आरंभ मराठी’च्या बातमीमुळे विस्कळीत झालेली सेवा पुन्हा पूर्ववत सुरू झाली आहे.
