आरंभ मराठी / धाराशिव
एका गावात सावत्र मुलाने स्वतःच्या सावत्र आईवर लैंगीक अत्याचार केल्याची धक्कादायक घटना उघडकीस आली आहे. महिलेवर लैंगिक अत्याचार करून साथीदारासह महिलेला बेदम मारहाण करण्यात आली आहे.
या प्रकरणी कळंब पोलीस ठाण्यात संबंधित आरोपी आणि त्याच्या साथीदाराविरुद्ध विविध कलमान्वये गुन्हा दाखल करण्यात आला असून पोलिसांनी तपास सुरू केला आहे.
पोलिसांकडून मिळालेल्या माहितीनुसार, पीडित महिला (वय 26, नाव व गाव गोपनीय) या दिनांक 19 फेब्रुवारी 2026 रोजी रात्री सुमारे 9.30 वाजता आपल्या घरी एकट्या असताना ही घटना घडली. त्यावेळी तिचा सावत्र मुलगा हा घरात आला.
पीडित महिलेला कायमचे माहेरी पाठवून देऊन स्वतःच्या आईला पुन्हा घरात आणण्याच्या उद्देशाने त्याने तिच्यावर जबरदस्तीने लैंगीक अत्याचार केला, अशी तक्रार पीडितेने दिली आहे. या घटनेदरम्यान आरोपीसोबत असलेल्या दुसऱ्या एका तरुणाने पीडित महिलेचे पाय धरून ठेवले. दोघांनी मिळून पीडितेला शिवीगाळ करत लाथाबुक्यांनी मारहाण केली. या घटनेमुळे पीडित महिला गंभीर मानसिक धक्क्यात गेली असून तिने दुसऱ्या दिवशी 20 फेब्रुवारी 2026 रोजी कळंब पोलीस ठाण्यात प्रथम खबर (एफआयआर) दाखल केली.
पीडित महिलेच्या तक्रारीवरून आरोपी सावत्र मुलगा व त्याच्या साथीदाराविरुद्ध भारतीय न्याय संहितेच्या कलम 64, 114, 116, 115(2), 352 आणि 3(5) अन्वये गुन्हा नोंदविण्यात आला आहे.
या प्रकरणाचा पुढील तपास कळंब पोलीस करत आहेत. या घटनेमुळे परिसरात खळबळ उडाली आहे.
